SÀDILI: Initziativa de amparu de su territòriu

Is voluntàrius de sa Protetzioni civili de Sàdili ant prantau prus de centu matas noas de ìlixi pròpriu in su cùcuru de fronti a sa bidda, in localidadi Pitz’e Arci.

“Non traballaus feti po parai fronti a is emergèntzias, ma fintzas po s’amparu de su territòriu e po sa preventzioni”, at nau Efìsiu Pilia de sa Prociv de Sàdili, “s’interventu de avaloramentu ambientali at interessau fintzas una gruxi de linna, chi dd’iant posta in cussa zona de monti is missionàrius in is annus Trinta de su sèculu passau, arrennoada a pustis de bint’annus e chi imoi fuat torra in istadu malu, po cussu dd’eus a mudai cun una gruxi noa”.

Ant agiudau po sa bona arrennèscida de su progetu s’amministratzioni comunali e sa setzioni locali de s’Assòtziu natzionali de ex cumbatentis, ghiada de Paolo Boi. S’assessori comunali po sa Protetzioni civili de Sàdili Sonia Vargiu at cumentau aici: “Seus prexaus meda po sa bona arrennèscida de custa initziativa. Sa collaboratzioni intre assòtzius e amministratzioni funtzionat sèmpiri. In custa manera eus a donai a is generatzionis de su benidori un’àteru padenti, chi s’aciungit a is chi teneus totu a ingìriu de su territòriu comunali nostu”.

[Furriau de s’artìculu de Antoni Pintori in https://www.unionesarda.it/articolo/news-sardegna/provincia-cagliari/2019/03/04/a-sadali-i-volontari-della-protezione-civile-hanno-messo-a-dimora-136-842940.html?fbclid=IwAR0XDPLO283-E_G1P0to75zfQRh2jeZQaxOoBD12OrNz59rUvOygJ1Ji7Jk]