Coru polifònicu “Sinfonie nel vento”

 

39944429_2103463456393120_2048213325858209792_n

Su coru polifònicu “Sinfonie nel vento” de Seulu nascit in su mesi de cabudanni de su  2015 po voluntadi de sa maista Donatella Sottovia, chi est fintzas sa diretora de su coru. S’iscopu de s’Assòtziu est cussu de fai connòsciri in Sardìnnia, in Itàlia e in su mundu sa cultura musicali e poètica sarda, poderendi sèmpiri in su repertòriu cantus traditzionalis in sardu. Ma non bastat. Su coru sighit in s’istùdiu e in sa sperimentatzioni vocali e musicali proponendi fintzas cantus popularis italianus e istràngius e cumponimentus inèditus, ponendusì aici in una positzioni mesana intre coru traditzionali e modernu. Is cumponentis funt 12 intre mascus e fèminas, ma s’interessu e sa crosidadi de medas, chi fatu fatu s’acòstiant a provai, portat su coru “Sinfonie nel vento” a tènniri un’abertura fitiana a s’esternu, pighendi in cunsideru boxis noas e, duncas, coristas nous.

A pustis de sa primu esibitzioni pùblica in su 2015, su coru at sighiu una carriera ativa in medas cuntestus e ocasionis, non feti po sagras e festas (feti po ndi numenai unas cantu: “Sagra del vino” de Jerzu, “Fiera internazionale del gusto” de Casteddu,  “Festival internazionale di cori” in is grutas de Domusnovas e in sa Basìlica de Sant’Antiogu, “Primavera sulcitana” de Carbonia), ma pighendi parti cun prexeri a progetus sotzialis e de solidariedadi, coment’e “”Mille voci per ricominciare”, ispetàculu musicali po agiudai sa populatzioni de Amatrice a pustis de su terremotu,  “Sa paradura artìstica”,  “Cuncertu in is repartus de oncologia in su Busincu”. In su mesi de làmpadas de su 2018 at pigau parti a s’atòbiu de cuncàmbia culturali cun sa Valtellina a Tresivio (SO), e in su 2019 s’aprontant a pigai parti a un’àteru atòbiu de sa matessi genia in Toscana, òspitis de sa corali S.Vincenzo Ferrer. 

Po sighiri is atividadis de su coru, custas funt is datas de is esibitzionis po is mesis imbenientis:

  • 1 Làmpadas 2019: Cunvènniu “Nel club oltre l’alcool” in Bosa

  • 8 Làmpadas: Memorial Pierpaolo Fadda in Barùmini

  • 19 Argiolas: Fèstival internatzionali de Buggerru

  • 18 Austu: Fèstival internatzionali de Carloforte

  • 12/13 Ladàmini: cuncertu in San Vincenzo (Toscana)

 

60813298_686226951807794_5526550559697403904_n60607745_2402689649783387_5674832317021945856_n