Nuraxi de IS PARAS


Su nuraxi de “Is Paras”, aici numenau poita ca est postu in unu terrenu chi fiat de propriedadi de is Paras Iscolàpius (in su 1600), s’agatat in pitzus de unu cùcuru pagu foras de sa bidda andendi fàcias a nord, a 500 metrus de artària.

Is datus bessius a pillu de is stùdius si narant ca su Nuraxi at tentu una stòria longa e ca dd’ant fraigau assumancu in cincu fasis, intra de su de XV sèculus innantis de Cristu e su de VIII sèculus apustis de Cristu.

Is primus treballus de sgavu fatus in is annus 1974-76 fuant serbius po scorrovai sa turri prus manna, sa de mesu, sa pratza de cad’e aintru e una de is turris piticas, sa chi torrat a parti de bàsciu; invecis àterus sgavus fatus in su 1998 iant permìtiu de ndi bogari a pillu su muru chi serbiat po amparai su fràigu, duus tretus pesaus in su tempus de is bizantinus e unus cantu bastionis postus a parti de orienti. A ùrtimu, intra de su 2006 e de su 2008, ant aconciau is murus de cad’e aintru e de cad’e foras de sa turri maiori, prenendi is bùidus cun unu impastu de argidda, donendiddi amparu de s’àcua chi intràt dònnia borta chi proiat e fiat unu perìgulu po totu sa strutura.

tholos-del-nuraghe-is-paras-isili.jpg

Cun sa tholos de 11,80 metrus – sa prus arta e beni fata de is chi si connoscint a oi – e cun is crastus mannus de tuvu chi ndi pesant sa strutura, su Nuraxi de Is Paras podit èssiri nomenau su “giganti biancu” de Sarcidanu.